رئيس مجلس الادارةزيــدان نافـع
رئيس التحريرمحمد سعيد المصرى

أغسل قفاك كويس .. علشان اللسعة الجديدة الجاية !!!

أغسل قفاك كويس .. علشان اللسعة الجديدة الجاية !!!

بقلـم/ صـــــــــــلاح إدريـــــــــــــــــس

سبحان الله ياأخى .. قفا العالم كله كوم .. وقفا المصريين كووووم تااانى خااالص .. المصرى من كتر مااتضرب على قفاه طوال 70 سنة تقريبا ياكبد أمه .. قفاه  جَلِّد .. وبقى تخين كده ,,من كتر القشف اللى أتربى عليه راقات وراقات !!!

حاجات كتيرة بنشوفها من زمان حواليتا فى العالم كله .. وبنتمناها تحصل فى مصرنا المحروسة .. والحمدلله ربنا أستجاب لدعائنا ورجانا .. وبدأت حاجات كتيرة تتحقق فى الكام سنة اللى فاتت .. وبقينا قادرين نشوف ضوء شمعة فى آخر النفق .. وبقى عندنا أمل فى مستقبل أفضل لهذه الأمة العريقة ..الضاربة فى التاريخ .. واللى بيقولوا عليها أنها أقدم من التاريخ نفسه .

الحاجة الوحيدة اللى مش لاقيين لها حل ..ولا لاقيين لها مالكة هى مجلس الشعب .. أو مجلس النواب .. أو أى مجلس تشريعى فى بلدنا .. من أيام عبد الناصر ولغاية النهاردة  تحس ياأخى أن الناس اللى بتترشح ..واللى بتنتخب كمان هى هى .. والآراء هى هى .. والحصانة هى هى .. والنفاق ..والوصولية ..والغش ..والخداع ..ومئات الوشوش للنائب الواحد  همه همه .. !!

علشان لسه لغاية النهاردة لما بنيجى نختار نوابنا فى البرلمان .. بنختار قرايبنا .. أو أصحابنا .. أو جيراننا .. أو من قبيلتنا .. أو أى صفة أو قرابة .. غير أنه يكون صالح، ونافع ،ومثقف ،وفاهم ،وموثوق فيه وفى أمانته ..ومتأكدين أنه حايمثلنا فعلا ومش حايمثل علينا !! ..وحايتكلم بأسمنا فعلا .. وأنه حريص على مصالح أهل دايرته ومصر كلها .

ودايما بننسى  أنه مش معنى أن القيادة السياسية موثوق فيها .. يبقى كل المؤسسات موثوق فيها ،وفيمن يمثلها .. كلام فاضى ومالوش معنى .. لأنك ببساطة لو بصيت على مجالس النواب منذ عشر سنوات تقريبا .. يعنى من ثورة يناير ,, حاتلاقى  وشوش كالحة ،بهتانة ،منافقة  ،خايفة حتى أن تجبر رئيس المجلس على إذاعة الجلسات على الهواء ..علشان ماتبنش العيوب ..  والثقوب ..والبلاوى السودة على الناس  .. وتبقى فضيحتهم بجلاجل ..زى فضيحة المطاهر يوم خروجه على المعاش !!

أنا عندى ملف أسمه ( مساوىء مجلس الشعب ).. كنت بأجمع فيه كل مقالاتى ..وكل مساوىء البُعدا  خلال آخر مجلس فقط .. وصدقونى والله العظيم ثلاثة لما حبيت  أراجع هذه المساوىء علشان أضيفها لهذا المقال .. لقيت أننى محتاح كتاب كبير ..مش كام سطر فى جريدة ..  لكن حاأختار أسوأ المساوىء ..

ـــ  زى ماقلت أول وأهم حاجة  هى أشتراك النواب كلهم أو خلينا نقول 80% منهم على عدم إذاعة جلساتهم على الهواء  ( زى ماكان بيعمل الأخوان المتأسلمين ).. ليه بقى .. علشان فضايحهم كتيرة .. وسيئاتهم ماتتعدش ولا تحصى .. وهمه مش عايزين ألفضايح توصل لأهالى دوايرهم !!

ـــ   أجتمعوا كلهم وأتفقوا على  إعفاء كل المجلس من أى ضرائب مستحقة على النواب  .. فى الوقت اللى رفعوا فيه الضرايب على عموم المصريين َ!!

ـــ عدم تشغيل التصويت الأليكترونى داخل القاعة .. رغم أنها مكلفانا ملايين الجنيهات من فلوس الكادحين الغلابة .. ليه بس ياعم الحاج .. علشان يبقى سهل نزور ،ونخدع ،ونمرر اللى أحنا عايزين نمرره .. وتبقى الكلمة الأشهر فى مجالسنا الموقرة ( موافقون …… موافقوووووووون )

ـــ موافقة النواب على القانون 393 من لائحة المجلس  اللى بتدى الحق لرئيس المجلس أن يعين العدد اللى يشوفه من رجال الشرطة  للمجلس .. مش للحراسة لا سمح الله .. لكن للتواجد بالقاعة أثناء الجلسات !! ليه ؟ شوف أنت بقى  للتهديد .. والتخويف .. والعين الحمراء .. وأيه كمان دوول شرطة خاصة بالمجلس بصفة مستمرة ..ولا يأتمروا إلا بأمر رئيس المجلس !! واللى حايجننى أن الأعضاء المحترمين وافقوا .. والبوليس بيبقى واقف فوق دماغهم وهم بيناقشوا أمور الدولة !! حاجة تقرف بصراحة !!!!!

وحاتشوف نواب الخراب فى الشارع على غير العادة اليومين دووول .. ماهو موسم !! ..

أنا مش عاوز ..ومش قادر  أتكلم كتير عن مساوىء المجلس اللى حايروح فى ستين داهية كمان كام يوم ..لأننا جميعا عايشين وشايفين خيبة الأمل اللى راكبة جمل .. واللى أحنا كلنا السبب فى الخيبة دى !! .. واحنا السبب فى ضربنا على قفانا مرة ورا التانية ورا التالتة ..ومنهم خمس مرات على سهوة !!!

عندنا انتخابات قبل آخر الشهر( 23 أكتوبر ) ..وده الموسم الوحيد اللى ممكن تشوف فيه شكل النواب .. حايتمسحوا .. ويوعدوا .. ويتباهوا .. وينافقوا ..ويعملولك عجين الفلاحة .. ويقولوا كل اللى نفسك فيه .. وحاتلاقى  طلعلك أئتلاف دعم مصر ..وأئتلاف فى حب مصر .. وتحيا مصر ..ومستقبل وطن .. ومسميات كتيرة قوى.. كلها بتتمسح فى مصر ..وهى أصلا مالهاش أى علاقة بمصر ..وعلاقتها الأساسية مع مصالحها وأهداقها .. سواء أخوان أبليس اللى نازلين مستخبيين فى عبايات تانية كتير بأسم مصر !! .. أو أخوان ماركوس أو أخوان أبجنى تجدنى .. كلهم ولاد ستين فى سبعين .

فيه بقى مشكلة ولخبطة تانية فى النظام الأنتخابى .. نظام القايمة  ..والقاعدة ..والنايمة .. والمتسطّحة .. اللى بيندس فيها 80% من المشكوك فيهم وفى أنتمائتهم ..وبيندفسوا وسط القايمة ..وأنت تيجى تختار القايمة كلها غصب عنك .. وممنوع تنقى علشان ماتفعصش بقية القفص !!!

عندنا قايمة مطلقة ..وقايمة نسبية ..وفردى .. وحاجات مايفهمهاش المنتخب البسيط العادى .. وأؤكد لك أن كثير من المرشحين أنفسهم مش فاهمين ..وآهم داخلين وخلاص  .. ولو راجعت أسماء المرشحين حاتلاقى 99% منهم من أصحاب المال النفوذ .. وبالمناسبة تحليل المخدرات العشوائى اللى أتعمل للمرشحين  طلع منهم فى أول يوم 17 واحد مدمنين مخدرات !!!!!!

وتصدق أننا عندنا 104 حزب سياسى .. ومحدش يعرف منهم أكتر من خمسة ستة .. والباقى كلهم بنسمع عنهم بس !!!..ومنهم أحزاب كل أعضاءها 20 مثلا ..عبارة عن راجل ومراته ، وأولاده ، وولاد عمه ، ،وجوز امه، ومرات المرحوم  خاله، وهكذا .. وحاتسمع عنهم ومنهم اليومين دوول بس ..لغاية الأنتخابات ماتخلص  .. وبعد الأنتخابات  أبقى قابلنى .. أمك فى العِش ولا طارت !!

لكن رغم كل ده ..  بس ضرورى ضرورى تنزل وتنتخب .. وتأكِد حضورك ..وماتسمعش كلام المقاطعة اللى بيقوله البعض .. لأن المقاطعة معناها أنك بتعطى فرصة للى مايسواش ينجح ويمثلك غصب عنك .. لكن لو أنت معترض على أى حاجة أنزل برضه وأبطل صوتك ..وحُط فى خانة المرشح أسم أسماعيل ياسين .. أو القصرى  أو حتى عدلات كلينيكس .. المهم أثبت حضورك ورفضك لكل المرشحين الموجودين وعدم ثقتك فيهم .. بس مهم قوى أن تكون موجودا .

ربنا يهديك وينور بصيرتك ..وتختار صح المرة دى ..علشان بصراحة قفاك بقى أحمر .. ومجنزر من كتر الضرب عليه ..ومش حايستحمل أى لسعة جديدة !!

شارك برأيك وأضف تعليق

جميع الحقوق محفوظه لــ بوابة شرم الإخبارية 2020 ©
%d مدونون معجبون بهذه:
التخطي إلى شريط الأدوات